ჯვარცმა 3

მე არ მეშინია ავიტანო ლანძღვა, რადგან ქრისტეს არ შეეშინდა ჩემ გამო აეტანა დამცირება.

არ მეშინია ავიტანო დაცინვა, რადგან დიდების მეფემ, უფალთა უფალმა, განკაცებულმა ღმერთმა, ცოდვილი ადამიანისთვის და ცოდვილი ადამიანისგან დაითმინა დაცინვა ჩემ გამო…

მე არ მეშინია დავამოწმო მის შესახებ, მე არ მეშინია ვისაუბრო გაბედულად ჩემს გადამრჩენელზე, თუ რა დიდებული და საოცარია იგი.

არ მადარდებს, რას იტყვიან ჩემზე…

არასოდეს დამავიწყდება, რომ მან მიხსნა, არასოდეს დამავიწყდება, რა გადაიტანა ჩემ გამო და იმ ხალხის გამოც, რომლებიც ხმამაღლა ყვიროდნენ: „ჯვარს აცვით“, „ჯვარს აცვით იგი“… ის კი არ დანებდა, არ დაეცა და მესამე დღეს აღსდგა, გაიმარჯვა სიკვდილზე და გზა გაგვიხსნა ზეცისკენ.

მე არ მრცხვენია მისი… არ მადარდებს რას იტყვიან ჩემზე… მთელ დიდებას და ქებას მივუძღვნი ჩემს მხსნელს, დიდებულს, ამაღლებულს, ძლევამოსილს და საიმედო დასაყრდენს.

დადგება დღე, როდესაც ქრისტე კვალავ დაბრუნდება…

გადაწყვიტე, რომ იცხოვრო მისთვის, შეიცანი ჭეშმარიტება და ჭეშმარიტება გაგათავისუფლებს შენ (იოან. 8:32). გახსოვდეს, რომ ის მარად ერთგულია, არ მიგაგდებს და არ მიგატოვებს, არ დაივიწყებს აღთქმებს, რომლებიც დაგიდო, რადგან მაშინაც კი, როდესაც შეეძლო მოეხმო ანგელოზთა ლეგიონებისთვის და მან არჩია თავი გაეწირა შენთვის ჯვარზე.

არ უარყო მისი მსხვერპლი, ნუ დაივიწყებ, რომ ის შენთვის ეწამა. ნუ შეგრცხვება იესო ქრისტესი…

მე იესო ქრისტეს მორწმუნე ვარ და არ მრცხვენია სახარების!

უფუარობის დღეები იდგა, იქ, ისრაელში , სადაც იესო ძოწეულით მოსილი, ნაგვემი იდგა ხალხის წინაშე და ბრბო გამძვინვარებული გაჰყვიროდა : ჯვარს აცვით იგი!” იქ, მრავალი საუკუნის უკან, გოლგოთის მთაზე მოხდა რაღაც, რამაც უბრალოდ კი არ შეცვალა მოვლენათა განვითარება, არამედ თვითონ გახდა ამ მოვლენათა თანმდევი… მოვლენა, რომელიც დროის მიღმა და ისტორიის ფურცლებზე კი არ ჩარჩა , არამედ ცოცხალ აწმყოდ იქცა თითოეული ჩვენთაგანისთვის.

მან თავისი სიკვდილით დასძლია ჯოჯოხეთის კარიბჭეები და მკვდრეთით აღდგომით იზეიმა გამარჯვება სიბნელეზე . მან, ვინც თითოეული ჩვენთაგანისთვის განკუთვნილ ჯვარს მიათრევდა საკუთარი მხრებით , ვისაც არ მიუძღოდა არანაირი ბრალი , მაგრამ ჰქონდა დიადი მიზანი – მოეცა ჩვენთვის საუკუნო სიცოცხლე , დასძლია სიკვდილი , თითოეული ჩვენთაგანისთვის განკუთვნილი… საკუთარ სხეულზე მიიღო ჩვენი წილი დარტყმების სიმძიმე და უხმოდ აიტანა ჩვენთვის გამზადებული დამცირება…ეკლის გვირგვინი და დაცინვის მოსასხამი ერგო , ჩვენ გამო, მას ვის მიერ და ვისთვისაც შეიქმნა ქვეყნიერება და ვისი ძალითაც დგას მთელი სამყარო.

არ არსებობს სხვა ფიზიკური თუ არამატერიალური ახსნა, რას შეიძლებოდა დაეჭირა დიადი ღმერთი რომაელთა საწამებელ იარაღზე , გარდა ჩვენდამი უსაზღვრო სიყვარულისა…

გილოცავთ ყველას აღდგომის ბრწყინვალე დღესასწაულს ! სიკვდილი შთაინთქა ძლევით!