გილოცავთ… კიდევ ერთხელ შემობრუნდა დედამიწა მზის გარშემო…

0 28

კიდევ ერთხელ შემობრუნდა დედამიწა მზის გარშემო. კიდევ ერთხელ გაიარა ეს გზა, უკვე მერამდენედ უხსოვარი დროიდან… კიდევ ერთი წელი, 365 დღე, გავაცილეთ წარსულისკენ. იწყებს დედამიწა მომდევნო წრეს მხურვალე ვარსკვლავის გარშემო და მოდის ახალი დღეები, ახალი საათები, ახალი წუთები…

ვფიქრობდი წუხელ ახალ წელზე, ვფიქრობდი, საერთოდ, სიცოცხლეზე, ჩვენს დედამიწაზე… ადამიანებზე…

დადის მოხუცი დედამიწა, წლებით დამძიმებული და დასერილი ამდენი ტკივილითა და მწუხარებით… დადის და ბრუნავს მზის გარშემო, სხვა გზა არ იცის, სხვაგან არსად აქვს წასასვლელი და დაატარებს ადამიანების ტკივილს, იმედგაცრუებას, დარდსა და სიკვდილს… და ხან, როცა ამდენს ვეღარ იკავებს გულში, შუბლს იჭმუხნის და ტირის… ჩვენ ამას წვიმას ვეძახით…

ვფიქრობდი ღამით, სამყაროს ცენტრია დედამიწა თითქოს, ეს პაწაწინა და განსაკუთრებული პლანეტა… რამდენს უცხოვრია მასზე და ისიც დიდსულოვნად იტანს კეთილსა თუ ბოროტს, კარგსა თუ ცუდს… დაატარებს და დადის უცვლელი მარშრუტით. არც ერთი წამით არ ჩერდება და ცდილობს არ იფიქროს… არ იფიქროს, რამდენი ცოდვა-მადლია მის ზურგზე…

წუხელ ვფიქრობდი… კიდევ ერთ წელი მოგვაკლდა-მეთქი… არა, არ მოგვემატა, მოგვაკლდა… რაც უფრო წინ მივდივართ, მით უფრო გვაკლდება წლები… ჰოდა, აი, დედამიწამ მზეს კიდევ ერთხელ შემოუარა ჩვეული ტემპით და რევერანსით გამოეთხოვა განვლილ გზას, რათა ისევ ახლიდან დაადგეს იმავე ბილიკს…

ამაღამ ახალი წელი დგება…

ზოგი ოჯახი სავსეა ხვავითა და ბარაქით, სიხარულითა და ბედნიერებით, ზოგი კი − ცარიელი…

ზოგს ღიმილი არ სცილდება თვალებიდან, ზოგს − ცრემლი…

ზოგს სცხელა დეკემბრის ამ ცივ ღამეს, ზოგსაც გული ეყინება მკერდში სიცივით…

ზოგან საჩუქრების გახსნით გამოწვეული შარიშური და მხიარული შეძახილები ისმის, ზოგან კი სიჩუმეა… რადგან არაფერია გასახსნელი და ბავშვებმაც იციან ეს…

ახალი წელი დგება… გილოცავთ… ბანალურ მილოცვებს არ მოვყვები… გისურვებთ (ჩემს თავსაც, მათ შორის) მხოლოდ იმას, რომ ფეირვერკების ხმაურმა და შეძახილებმა არ ჩაახშოს ჩვენში თანაგრძნობისა და თანადგომის ხმა, გისურვებთ, რომ ნაძვისხეების თვალისმომჭრელი მორთულობისა და ბრჭყვიალა გირლანდებით აფერადებული ქუჩების მიღმა ცრემლიანი თვალების დანახვა ყოველთვის შეგვეძლოს…

გილოცავთ… თავს არ მოვიტყუებ და პათეტიკურად არ ვიტყვი, რომ, დაე, ამ წელს სულ სიხარული, ბედნიერება და ხალისი გქონდეთ-მეთქი… ჩვენ ყველამ ვიცით, რომ სულ სიხარული და სიცილი შეუძლებელია… რომ ჩვენი დღეები სევდაგარეული და დარდმორეულია ხშირად… სწორედ ამიტომ, გისურვებთ, რომ ასეთ დღეებშიც კი უფლის იმედით მშვიდდებოდეთ, გისურვებთ, რომ ძალა გქონდეთ ყოველი დაბრკოლების დასაძლევად და გასაჭირში მყოფთ მაინც შეგეძლოთ სხვების დახმარება…

დაე, ამ წელს თუნდაც ერთით ნაკლები ცრემლი იყოს… ერთით ნაკლები მწუხარება… ერთით ნაკლები იმედგაცრუება…

გილოცავთ ახალ წელს… უფლის რწმენას და დიდ გულს გისურვებთ…

Loading...