მე არ დავსრულდი…

0 409

გამარჯობა,

არის აქ ვინმე? ერთი წუთით მომისმინე…

მე აქ ვარ, მტკივა, მეტისმეტად მტკივა, გაუსაძლისად, ისე, რომ ბაგეს ვეღარ ვხსნი, საუბარი აღარ მინდა.

გუშინ ღამით სიკვდილს გადავურჩი, ერთი ნაბიჯიღა მაკლდა და დავსრულდებოდი.

დავსრულდებოდი…

დასრულდებოდა დედა, დასრულდებოდა მეგობრობა, დასრულდებოდა ის ომი, რომელშიც ვიმყოფებოდი, მაგრამ ამ ომში მარტო მე კი არა, ყველა უთუოდ დაეცემოდა, გარდა ტკივილებისა, გარდა დარდებისა, რადგან მე აღარ ვიქნებოდი; მე, ვისაც შეეძლო, რომ გაეძლო, არა საკუთარი თავის გამო, არამედ იმ ადამიანებისთვის, ვისაც ჩემი არყოფნა მოკლავდა.

ჩემი დასრულება მოკლავდა დედას, ჩემს თანაკლასელს, მამას, ჩემს ძმას, რომელიც სახლში მელოდება, დას, რომელსაც ვჭირდები, მეზობელს, რომელსაც ისედაც ათასი დარდი აწევს გულზე.

ჰო, კიდევ, ყველაზე მეტად ჩემს ძაღლს მოკლავდა ჩემი არყოფნა, მას მხოლოდ მე ვაჭმევ.

მე აქ ვარ, მხოლოდ მე და შენ ვართ, არავინ გვისმენს და შემიძლია, ერთი სიმართლე გითხრა, რომელსაც არავის ვუმხელ. მომისმინე, იცი, ისე მინდა ხოლმე სხივისი გულის ტკენა ჩემი სიკვდილით, ზოგჯერ მშობლები ვერ იგებენ და ისე მინდა ხოლმე, რომ წავიდე, გავქრე, ვაიძულო იმ სამყაროში ყოფნა, სადაც მე არ ვარ, რომ გაიგონ, როგორი მნიშვნელოვანი ვიყავი… არა მარტო დედას ან მამას, მინდა ჩემს თანაკლასელს, ჩემს მეზობელს, ჩემს დას, ჩემს ძმას, ჩემს უახლოეს მეგობარს დავუმტკიცო ხოლმე, რომ უჩემო სამყარო მძიმე და საშინელია!

ჰო, მინდა ხოლმე, რომ ყველას სამაგიერო გადავუხადო ჩემი სიკვდილით, აი, ასეთი სუსტი და ეგოისტი ვარ.

იმის მაგივრად, რომ ძლიერი გოგო ვიყო, იმის მაგივრად, რომ სხვები დავიცვა, ვიხსნა ტკივილისაგან, იმის ნაცვლად, რომ ჩემი არყოფნის სევდისგან გადავარჩინო, მე სიკვდილს ვარჩევ, გავრბივარ და კიდევ უფრო მეტ დარდს ვტოვებ მათ წინ.

აი, დღეს აქ ვარ კიდევ ერთხელ გადარჩენილი, გუშინ მე არ დავსრულდი, ჰო, გუშინ მე მტკიცე გოგო ვიყავი, გუშინ მე ჩემი თავი სიკვდილისგან ვიხსენი და დღეს გმირი ვარ, იმიტომ, რომ სიცოცხლე გადავარჩინე, ეს სიცოცხლე მე მეკუთვნოდა, მაგრამ ხომ გადავარჩინე?..

გინდა, ისევ გითხრა რაღაც? მე მომეწონა ჩემი სიმტკიცე, ძლიერება, მე მომეწონა ჩემი თავის გადარჩენა.

იცი, შენ თუ დასრულდები, მეც მომკლავ, და გთხოვ, არ დასრულდე, იმიტომ, რომ მე სიცოცხლე ძალიან მინდა, იმიტომ, რომ გუშინ სულიერად მტკიცე, ძლიერი გოგო გავხდი, ჩემი სიცოცხლე გადავარჩინე და დღეს შენი სიკვდილით ნუღარ მომკლავ, გადამარჩინე, გევედრები, გადამარჩინე მეც და შენი თავიც.

მერე მოდი და მითხარი, როგორ გადარჩი, მე კი იმას მოგიყვები, თუ როგორ ვაგრძელებ სიცოცხლეს.

აქ ვარ და გელოდები, რომ გადამარჩენ.

Loading...