რის გამო ორგულობ ღმერთს?

0 142

„ახლა მოიშორეთ უცხო ღმერთები, თქვენ შორის რომ არიან, და მომართეთ თქვენი გული უფლის, ისრაელის ღმერთისკენ.“ (იესო ნავეს ძე 24:23).

და რა არის შენი ღმერთი დღეს?

დიახ, “რა” და არა – “ვინ”.

რა არის შენი ღმერთი დღეს?

როგორ ფიქრობ, შენი რასთან დამოკიდებულება, რასთან მიმართება არ მოსწონს უფალს დღეს?

პირისპირ რომ იდგეს შენთან და გელაპარაკებოდეს, როგორც კაცი კაცს, რას გეტყოდა იგი? რას მოგაშორებინებდა? რაზე მიგითითებდა, რომ დაგეთმო?

რის გამო ორგულობ ღმერთს? რით აძლევ მას ეჭვიანობის საბაბს? შენი რომელი ქმედება სტკენს მას გულს?

სად გაქრა წრფელი ნდომა, წყურვილი? რით ანაცვლებ უფალთან საურთიერთო დროს?

რა არის ფიქრები, რომლებიც თავიანთ მსახურად გხდიან? რომლებიც მონობაში გამყოფებენ, მსგავსად ეგვიპტეში მყოფი ებრაელებისა?

რა გიშლის ხელს აღთქმული მიწის დასამკვიდრებლად, რომელიც გამზადებული აქვს უფალს და პირადად მოგმართავს: „რაღას აყოვნებთ, რატომ არ მიდიხართ იმ მიწის დასამკვიდრებლად, რომელიც მოგცათ უფალმა, თქვენი მამების ღმერთმა?!“ (იესო ნავეს ძე 18:3).

განა ეს მიწა ის დიდებული მომავალი არ არის, რომელიც ქრისტემ თავისი სიკვდილით მოიპოვა კონკრეტულად შენთვის?!

ფასად სისხლი გადაიხადა და სიცოცხლის დათმობით წერტილი დაუსვა ყოველგვარ ურჯულოებას.

ეწამა…

შენთვის ეწამა

რა არის შენი ღმერთი დღეს?

რა ანაცვლებს იმ ტკივილს, რაც ჯვრამდე მიმავალმა გაიარა?

რა არის ტოლფასი მილურსმული ქრისტეს განცდებისა?

რა არის შენი ღმერთი დღეს?!

შეედრება კი ისეთ სიყვარულს, რომელმაც ერთადერთი ძე არ დაინდო შენ გადასარჩენად?

ნუთუ შეძლებს ადამიანი ყოველივე ამის დაფასებას?!

ნუთუ არსებობს გზა, რომლითაც მადლიერებას გამოხატავს იგი ცოცხალი, აღმდგარი ღმერთის მიმართ?

დიახ, აღმდგარი ღმერთის მიმართ.

2000 წლის წინ შენი გადარჩენისთვის ნაწამები, თუმცა სამი დღის შემდეგ სამარადისოდ აღმდგარი ღმერთის მიმართ.

სამარადისოდ!

სამარადისოდ!

მუდამ!

უკუნისამდე!

სამარადისოდ!

საჭიროებ კი სხვა ღმერთს დღეს?

თავისუფალი ნება გაქვს მოცემული, უბრალოდ უნდა გადაწყვიტო, რას ირჩევ დღეს.

„და თუ ბოროტებად თვლით თქვენს თვალში უფლის მსახურებას, დღესვე აირჩიეთ, ვის ემსახუროთ უთხრა იესო ნავეს ძემ ხალხს, რომელთაც ღმერთებად კერპები ჰქონდათ შექმნილნი.

და დღეს რა არის კერპები? არასწორი ურთიერთობანი, დამოკიდებულებანი, შეხედულებანი... ჩარჩოები, დამახინჯებული აზროვნება, რელიგიურობა, წესები... მიჯაჭვულობა ნივთებზე, ქცევებზე, ინტერნეტზე, ადამიანების ხელთა ნამოქმედარზე

და ვის ირჩევ შენ დღეს?

ადამიანის ფანტაზიითა და ხელით შექმნილ უსულო „ღმერთებს“, თუ ცოცხალს, რომელმაც „ისე შეიყვარა წუთისოფელი, რომ მისცა თავისი მხოლოდშობილი ძე, რათა ყოველი მისი მორწმუნე არ დაიღუპოს, არამედ ჰქონდეს საუკუნო სიცოცხლე!.. (იოანე 3:16).

გილოცავთ და გისურვებთ ქრისტეს აღდგომას თქვენს გულებში, თქვენს ცხოვრებაში, ერთხელ და სამუდამოდ, რათა აღსრულდეს უფლის ნება, რომელიც არის კეთილი, სასურველი და სრულყოფილი, და თქვენს ცხოვრებაში მეფობდეს ის ერთადერთი, რომელიც ჭეშმარიტად არის ღირსი ქების, დიდების, პატივისა და თაყვანისცემის!..

Loading...